
那洛巴大师教言集NARO25འོག་སྒོ་ལས་ཀྱི་རྡོ་རྗེའི་ཤོག་རིལ།
1-4-26a

༄༅། །འོག་སྒོ་ལས་ཀྱི་རྡོ་རྗེའི་ཤོག་རིལ།
༄༅། །འོག་སྒོ་ལས་ཀྱི་རྡོ་རྗེའི་ཤོག་
རིལ་བཞུགས། བློན་པོ་རིགས་གསུམ་ལས་བྱེད་ཡིན་ནོ། །ཧཱུཾ་ཧེ་རུ་ཀ་ལ་ཕྱག་འཚལ་ལོ། །རྒྱལ་པོ་ཆོས་ཉིད་སྐྱེ་མེད་ལས། །བློན་པོ་རིགས་གསུམ་ལས་བྱེད་ཡོད། །དམངས་ནི་ཕྲིན་ལས་འཐུན་སྦྱོར་
གྱི། །དགོས་པའི་དུས་སུ་བསམས་པས་ཆོག །བློན་པོ་རིགས་གསུམ་ལས་བྱེད་ལ། །རྩ་དང་རླུང་དང་ཐིག་ལེ་གསུམ། །རྩ་རླུང་ཐིག་ལེ་གསུམ་གྱི་(གྱིས་)ནི། །ལས་ཚོགས་ཐམས་ཅད་བསྒྲུབ་(སྒྲུབ་)པར་བྱེད། །
རྩ་ནི་ཁྱིམ་དང་འདྲ་བས་ན། །རླུང་གི་རང་བཞིན་མི་ཡིན་ཏེ། །ཐིག་ལེ་ནོར་བུ་རྒྱལ་བས་གསུངས། །རྩ་རླུང་གཉིས་པོ་མ་བསྒོམས་པར། །ཐིག་ལེ་ཡོད་ཀྱང་བྱང་ཐང་གི། །གཉེར་བྱེད་མེད་པའི་ནོར་
1-4-26b

དང་འདྲ། །ཉམས་དང་པོ་དང་ཟེགས་ལ་སོགས། །བདེ་ལོངས་སྤྱད་དུ་ག་ལ་འབྱུང་། །རྩ་དང་ཐིག་ལེ་མ་བསྒོམས་ན། །རླུང་རྐྱང་གཅིག་ཏུ་བསྒོམ་པ་ནི། །མི་རྟོགས་བཀོག་པོར་ཕྱུང་འདྲ་བའི། །གཞན་གྱིས་
བཀུར་བའི་གནས་མེད་དོ། །འཕྲལ་དུ་སྡུག་ལ་ཕུགས་སུ་སྟོངས། །རླུང་དང་ཐིག་ལེ་མ་བསྒོམས་ན། །རྩའི་རང་བཞིན་བསྒོམས་ལགས་ཀྱང་། །ཁང་སྟོང་གཉེར་བྱེད་མེད་འདྲ་བའི། །བྱ་དང་བོང་བུ་ཁྱི་
ཕག་གི། །གནས་མལ་དེ་ལས་གཞན་གྱིས་ནི། །དགོས་འདོད་འབྱུང་བར་མི་འགྱུར་རོ། །དེ་ལ་རྩའི་མཚན་ཉིད་ནི། །ཨ་བ་དྷུ་ཏི་སྲོག་གི་རྩ། །གཡས་གཡོན་རོ་རྐྱང་གཉིས་པོ་ནི། །ལུས་ཀྱི་རྩ་རུ་
འདོད་པ་ཡིན། །སྤྱི་བོ་བདེ་ཆེན་འཁོར་ལོ་ནི། །རྩ་འདབ་སུམ་ཅུ་སོ་གཉིས་པོ། །ཁ་དོག་དཀར་པོ་འཁོར་ལོའི་དབྱིབས། །བདེ་བའི་འབྱུང་གནས་ཉིད་དུ་འདོད། །ལས་ཀྱི་ཕྱག་རྒྱའི་རྫོགས་རིམས་
ནི། །དེ་དབུས་བ་ཡི་ནུ་མ་འོ། །མགྲིན་པ་ལོངས་སྤྱོད་འཁོར་ལོ་ནི། །བཅུ་དྲུག་རྩའི་འདབ་མ་སྟེ། །ཁ་དོག་དམར་པོ་པདྨའི་དབྱིབས། །སྒྱུ་མ་རྟོགས་པའི་གནས་ཡོད་དེ། །རྨི་ལམ་དུས་ཀྱི་རྫོགས་
རིམས་ཡིན། །དེ་དབུས་ཐིག་ལེ་དམར་པོ་འོ། །སྙིང་ཁ་ཆོས་ཀྱི་འཁོར་ལོ་ནི། །རྡོ་རྗེའི་དབྱིབས་ལ་རྩ་འདབ་བརྒྱད། །ཁ་དོག་སྔོན་པོར་འདོད་པ་ཡིན། །མི་རྟོག་སྐྱེ་བའི་གནས་ཡིན་པས། །འོད་
1-4-27a

གསལ་དུས་ཀྱི་རྫོགས་རིམས་ཡིན། །དེ་དབུས་ཧཱུཾ་ལ་དམིགས་པ་བསྒོམ། །ལྟེ་བ་སྤྲུལ་པའི་འཁོར་ལོ་ནི། །རྩ་འདབ་དྲུག་ཅུ་རྩ་བཞི་པོ། །ཁ་དོག་སྣ་ཚོགས་དྲ་བའི་དབྱིབས། །
སྣ་ཚོགས་དངོས་གྲུབ་དེ་ལས་འབྱུང་། །ཐ་མལ་ལུས་ཀྱི་རྫོགས་རིམས་ཡིན། །དམིགས་པའི་འཕྲིན་ལས་གང་བྱེད་གཙོ། །རླུང་གི་མཚན་ཉིད། རླུང་སྣ་བུག་གང་ནས་རྒྱུ་བ། གྲངས་དུ་རྒྱུ་བ། འབྱུང་བ་
གང་གི་རླུང་རྒྱུ་བ། རླུང་རྒྱུ་བ་དལ་བྲེལ། རླུང་གི་ཁ་དོག །ལྷ་གང་ཡིན་པ། ཕྱི་ནང་དུ་རྒྱུ་བ་རིང་ཐུང་རྣམས་ཀྱི་སྦྱར་བཤད་ཡིན་ནོ། །འདི་བཞི་བཞིན་གནས། ཉིན་ཞག་གཅིག་ལ་ཐུན་ཆེན་བརྒྱད། །
འཕོ་བ་བཅུ་དྲུག་དག་ཏུ་འདོད། །རྩའི་གནས་ནས་འཕོ་བ་བརྒྱད། །རླུང་གི་གནས་ནས་དེ་བཞིན་ཏེ། །གོ་རིམས་བཞིན་དུ་ཤེས་པར་བྱ། །རྒུན་(དགུན་)ཟླ་འབྲིང་པོའི་སྔ་དྲོ་ལ། །མགྲིན་པའི་གནས་ནས་འབྱུང་
པའི་ཁམས། །རོ་ཧི་ཏའི་རླུང་རྒྱུ་བས། །སྟེང་སྒོ་གཡས་ནས་འབྱུང་བའོ། །ཉིས་བརྒྱ་བདུན་བཅུ་(ཅུ་)ཐམ་པ་དང་། །ཛ་ར་ནའི་གཡོན་ནས་འབྱུང་། །སྟེང་སྒོ་གཡོན་ནས་འབྱུང་བ་ལ། །གྲངས་ནི་གོང་དང་
མཚུངས་པར་འདོད། །གཉིས་ཀ་ནས་ནི་ས་འབྱུང་སྟེ། །ཆ་ཙམ་ཅུང་ཟད་དལ་བར་རྒྱུ། །བུ་ག་གཉིས་ནས་དྲག་པར་ནི། །འགྱུ་བ་རླུང་གི་རླུང་དུ་འདོད། །གྲངས་ནི་ལྔ་བརྒྱ་བཞི་བཅུ་ལས། །དེ་ལས་གཞན་པ་
1-4-27b

མི་འདོད་དོ། །འགྱུ་བ་མེད་པ་ནམ་མཁའི་རླུང་། །བགྲང་དུ་མི་བཏུབ་ཐུན་ཚོད་གཅིག །ཐུན་ཚོད་གཉིས་ཀྱི་དང་པོ་ལ། །སྙིང་ཁའི་གནས་ནས་འབྱུང་བའི་ཁམས། །དང་པོ་ཆུ་རླུང་རྒྱུ་བ་དེ། །ཁ་དོག་སྔོན་པོར་
རབ་ཏུ་བཏགས། །དེའི་རྗེས་ལ་ས་ཡི་རླུང་། །ཁ་དོག་སེར་པོར་མཉམ་དུ་འདོད། །རླུང་དང་མེ་ཡི་ཁ་དོག་ནི། །རླུང་གི་ཁ་དོག་ལྗང་པ་སྟེ། །མེ་ནི་དམར་བའི་མཚན་ཉིད་ཅན། །ཕྱིར་ལ་རྒྱུ་བར་འདོད་པ་ཡིན། །
གྲངས་ནི་སྟོང་ཚོ་གཅིག་དང་ནི། །བརྒྱད་ཅུ་ཐམ་པར་འདོད་པ་ཡིན། །ནམ་མཁའི་རླུང་ལ་ཁ་དོག་མེད། །གོང་མ་ཚར་ནས་ཤུགས་ལ་འབྱུང་། །ཐུན་ཚོད་གསུམ་གྱི་དང་པོ་ལ། །ལྟེ་བའི་གནས་ནས་འབྱུང་
བའི་ཁམས། །སའི་དཀྱིལ་འཁོར་ཉིད་ཡིན་ཏེ། །རིན་ཆེན་མགོན་པོ་འབྱུང་བ་ཡིན། །རླུང་གི་དཀྱིལ་འཁོར་ཉིད་ལས་ནི། །ལས་ཀྱི་མགོན་པོ་བྱོན་པ་དང་། །མེ་དང་ཆུའི་དཀྱིལ་འཁོར་ལས། །པདྨ་མགོན་
དང་རྡོ་རྗེ་མགོན། །གོ་རིམས་བཞིན་དུ་བྱོན་ནས་སུ། །ནམ་མཁའི་མགོན་པོ་དབྱིངས་ན་གནས། །སངས་རྒྱས་རེ་ལ་སྐུ་ཚེ་ནི། །ཉིས་བརྒྱ་བདུན་ཅུ་རེ་རེ་ལ། །གྲངས་ནི་མཉམ་པ་དག་ཏུ་འདོད། །ཐུན་ཚོད་
བཞིའི་དང་པོ་ལ། །སྤྱི་བོའི་གནས་ནས་འབྱུང་བའི་ཁམས། །རླུང་གི་རླུང་ཉིད་རྒྱུ་བས་ཏེ། །ཕྱི་རུ་འཕེན་པ་སོར་བརྒྱད་དང་། །ནང་དུ་བསྡུད་པ་སོར་བརྒྱད་དེ། །གཉིས་ཀ་བཅུ་དྲུག་དག་དུ་(ཏུ་)འདོད། །དེའི་
1-4-28a

རྗེས་ལ་མེ་རླུང་རྒྱུ། །སྤྱི་བོའི་གཙུག་ནས་སོར་བརྒྱད་དེ། །རང་གནས་མགྲིན་པར་བཅུ་གཉིས་ཡིན། །ཕྱི་ནང་གཉིས་ལ་ཉི་ཤུ་བཞི། །ད་ནི་ཆུ་རླུང་རྒྱུ་བས་ཏེ། །རླུང་གི་གནས་ལ་
སོར་བརྒྱད་ལ། །བཅུ་དྲུག་རང་གི་གནས་ན་རྒྱུ། །ཕྱི་གནང་(ནང་)གཉིས་ལ་སུམ་ཅུ་གཉིས། །ཐ་མ་ས་རླུང་རྒྱུ་བ་ནི། །སྤྱི་བོའི་གཙུག་ནས་སོར་བརྒྱད་དེ། །བཅུ་གཉིས་ལྟེ་བའི་དབུས་ནས་
སུ། །ཕྱི་ནང་གཉིས་ལ་བཞི་བཅུར་འདོད། །ནམ་མཁའི་རླུང་ལ་བརྒྱད་ཡིན་ཏེ། །རླུང་གི་རླུང་དང་མཉམ་དུ་གནས། །ཕྱི་ནང་གཉིས་ལ་བཅུ་དྲུག་སྟེ། །ཚོར་བ་མེད་པར་རྒྱུ་བ་ཡིན། །[སྣ་བུ་གཅིག་ནས་སྤྱི་བོ་ཐུག་
སོར་བརྒྱད། སྤྱི་བོ་ནས་མགྲིན་པའི་བར་སོར་བཞི། དེ་བཞིན་དུ་མགྲིན་པ་ནས་སྙིང་ཁའི་བར་སོར་བཞི། སྙིང་ཁ་ནས་ལྟེ་བའི་བར་སོར་བཞི། དེ་ཇི་ལྟ་བར་ཕྱིར་ལ་ཡང་སྣ་བུག་ཐུག་རྒྱུའོ། །སྣའི་རྩེ་ནས་ཕྱི་རོལ་དུ་རྒྱུ་བ་རིང་ཐུང་མཐའ་གཅིག་
ཏུ་མ་ངེས་པས་འདིར་མ་བསྟན་ནོ། །]ཐིག་ལེའི་མཚན་ཉིད་འདི་ལྟར་གནས། །སྤྱི་བོ་བདེ་ཆེན་འཁོར་ལོ་ན། །རྩའི་གཙོ་མོ་བརྒྱད་ཡོད་དེ། །གཡོན་ངོས་ཤར་གྱི་འདབ་མ་ནས། །འབྱུང་བ་ཆུ་ལ་དབང་བ་ཡི། །ཁ་
དོག་སྔོ་སྐྱའི་ཐིག་ལེ་གཉིས། །འཕོ་དང་གནས་དང་ལས་ཀུན་བྱེད། །ལྷོ་ངོས་མདུན་གྱི་འདབ་མ་ལ། །འབྱུང་བ་{-ས་-}ལ་དབང་བ་སྟེ། །སེར་སྐྱ་གསལ་བའི་ཐིག་ལེ་གཉིས། །འཕོ་དང་གནས་དང་ལས་ཀུན་
1-4-28b

བྱེད། །གཡས་ཀྱི་དམར་པོ་མེ་ལ་དབང་། །ནུབ་ངོས་དག་ཏུ་འདོད་པ་ཡིན། །རྒྱབ་ཀྱི་ལྗང་ཁུ་རླུང་ཡིན་ཏེ། །ཐིག་ལེ་འབྱུང་བ་བཞི་ལ་གྲུབ། །འཕོ་དང་གནས་དང་ལས་ཀུན་བྱེད། །བརྒྱད་ལས་བརྒྱད་ཆད་
བཅུ་དྲུག་འབྱུང་། །བདེ་བ་ཆེན་པོའི་གནས་ནས་སོ། །བརྒྱད་ཀྱི་སྟེང་དུ་བརྒྱད་བསྣན་པས། །དེ་ཡང་བཅུ་དྲུག་འབྱུང་བ་ཡིན། །མགྲིན་པ་ལོངས་སྤྱོད་གནས་སུའོ། །འབྱུང་བ་བཞི་དང་ས་ཕྱོགས་བཞི། །
སྔོན་ལ་སོང་བ་གཙོ་ལ་དྲིས། །ནམ་མཁའི་ཐིག་ལེ་དབུས་ན་གནས། །ནམ་མཁའ་ནམ་མཁའ་བཞིན་དུ་འཇུག །བཅུ་དྲུག་བརྒྱད་དུ་དྲིལ་ནས་སུ། །མགྲིན་པའི་གནས་ནས་སྙིང་གར་བབས། །སྙིང་
ཁའི་བྷོ་དྷི་ཙི་ཏ་དང་། །སྔར་གྱི་བརྒྱད་པོ་གཅིག་ཏུ་འདྲེས། །འབྱུང་བཞི་ལྟེ་བའི་ཐིག་ལེ་ལ། །ཆུ་ལ་ཆུ་ཉིད་བཞག་པ་འམ། །མར་ལ་མར་ཉིད་བཞག་པ་བཞིན། །བདེ་བ་ཆེན་པོའི་གནས་སུ་འཛག །ཐམས་
ཅད་མཉམ་དུ་འདྲེས་ནས་སུ། །བརྒྱད་བབས་འདུ་ཏིའི་མར་སྣ་ལ། །བཞི་གནས་ལུས་སེམས་བདེ་བས་ཁྱབ། །བཞི་ནི་གསང་བའི་རྡོ་རྗེར་བྱོན། །ས་དང་ཆུའི་ཐིག་ལེ་གཉིས། །པདྨའི་ནང་དུ་ཤོར་བ་དང་། །
མེ་དང་རླུང་གི་ཐིག་ལེ་གཉིས། །ནོར་བུའི་རྩེ་མོར་སྐད་ཅིག་གནས། །སྐད་ཅིག་བར་མཚམས་དེ་ཉིད་ལ། །ནམ་མཁའི་ཐིག་ལེ་འགྱུ་བས་ཏེ། །དེ་ལ་མི་རྟོག་སྤྲོས་དང་བྲལ། །ལས་ཅན་གང་ཟག་
1-4-29a

ཡིན་ན་ནི། །གཉུག་མ་ཆོས་སྐུ་མཐོང་ནས་མོས། །གཉིས་པོ་ཕྱི་རུ་མ་ཤོར་ན། །བདེ་ཆེན་གནས་སུ་སྤྱན་དྲོངས་ལ། །བརྒྱད་པོ་གནས་བཞིར་གོ་རིམས་བཞིན། །གོང་དུ་བྱོན་པའི་ནུས་པ་
དང་། །རང་ཉིད་སྟོབས་དང་ལྡན་གྱུར་ན། །སྔར་གྱི་ཉམས་པ་སོས་འགྱུར་ཏེ། །བདེ་ལ་མི་རྟོག་ཡེ་ཤེས་ནི། །ལྷུན་གྱིས་གྲུབ་པ་མངོན་དུ་བྱེད། །སྐུ་གསུམ་ཡེ་ཤེས་ལྔ་དང་ནི། །སངས་རྒྱས་ཕྲིན་ལས་མ་ལུས་
ཀུན། །དེ་ལས་འབྱུང་གི་གཞན་དུ་མིན། །རྨི་ལམ་དབང་གི་མན་ངག་ནི། གང་ཟག་དབང་པོ་ཐ་མའི་དབང་དུ་བྱས་ན། ཡི་དམ་གྱི་ལྷ་ལ་བརྟེན་ནས་རྡུལ་ཚོན་གྱི་དཀྱིལ་འཁོར་ཞལ་ཕྱེ་སྟེ། དབང་ནི་བུམ་པའི་
དབང་བསྐུར། བསྐུར་བའི་གནས་ནི་ལུས་ལ་བསྐུར། སྒྲིབ་པ་ནི་ལུས་ཀྱི་སྒྲིབ་པ་འབྱང་། གདམས་ངག་ནི་ཕྱི་བསྐྱེད་པའི་རིམ་པ་བསྟེན། དང་པོ་དགའ་བ་ཉམས་སུ་མྱོང་བ་ལས། འབྲས་བུ་ནི་སྤྲུལ་པའི་
སྐུ་ཐོབ། ཕྱག་རྒྱ་ནི་དམ་ཚིག་གི་ཕྱག་རྒྱ་དང་འབྲེལ། གང་ཟག་དབང་པོ་འབྲིང་གི་དབང་དུ་བྱས་ན། མིའི་བུ་མོ་ལ་བརྟེན་ནས། བྷ་གའི་དཀྱིལ་འཁོར་ཞལ་ཕྱེ་སྟེ། དབང་ནི་གསང་བའི་དབང་བསྐུར།
བསྐུར་བའི་གནས་ནི་ངག་ལ་བསྐུར། སྒྲིབ་པ་ནི་ངག་གི་སྒྲིབ་པ་འབྱང་། གདམས་ངག་ནི་ཟབ་མོ་བསྐྱེད་པའི་གདམས་ངག་སྟོན། གཉིས་པ་མཆོག་དགའ་ཉམས་སུ་མྱོང་བ་ལས། འབྲས་བུ་ནི་
1-4-29b

ལོངས་སྤྱོད་རྫོགས་པའི་སྐུ་ཐོབ། ཕྱག་རྒྱ་ནི་ལུས་ཀྱི་ཕྱག་རྒྱ་དང་འབྲེལ། གང་ཟག་དབང་པོ་རབ་ཀྱི་དབང་དུ་བྱས་ནས། བྱང་ཆུབ་སེམས་ཁུ་བའམ་རྣམ་པ་ལ་བརྟེན་ནས་འདུ་ཏིའི་དཀྱིལ་འཁོར་ཞལ་ཕྱེ་
སྟེ། དབང་ནི་ཤེས་རབ་ཡེ་ཤེས་ཀྱི་བསྐུར། བསྐུར་བའི་གནས་ནི་སེམས་ལ་བསྐུར། སྒྲིབ་པ་ནི་སེམས་ཀྱི་སྒྲིབ་པ་འབྱང་། གདམས་ངག་ནི་ཡོངས་སུ་རྫོགས་པའི་གདམས་ངག་བསྟོན(སྟོན)། གསུམ་
པ་ལྷ་གཅིག་སྐྱེས་པའི་དགའ་བ་ལས། འབྲས་བུ་ནི་ཆོས་ཀྱི་སྐུའི་འབྲས་བུ་ཐོབ། ཕྱག་རྒྱ་ནི་ཆོས་ཀྱི་ཕྱག་རྒྱ་དང་འབྲེལ། གང་ཟག་དབང་པོ་ཡང་རབ་ཀྱི་དབང་དུ་བྱས་ནས། ཚོགས་དྲུག་གི་ཡུལ་ལ་
བརྟེན་ནས། སྣང་སྲིད་ཀྱི་དཀྱིལ་འཁོར་ཞལ་ཕྱེ་སྟེ། དབང་ནི་ཚིག་དབང་རིན་པོ་ཆེའི་དབང་བསྐུར། བསྐུར་བའི་གནས་ནི་ལུས་ངག་ཡིད་གསུམ་ལ་བསྐུར། སྒྲིབ་པ་ནི་ལུས་ངག་ཡིད་གསུམ་གྱི་
སྒྲིབ་པ་འབྱང་། གདམས་ངག་ནི་ལྷུན་གྱིས་གྲུབ་པའི་གདམས་ངག་སྟོན། བཞི་པ་དགའ་བྲལ་གྱི་དགའ་བ་ལས། འབྲས་བུ་ནི་སྐུ་གསུམ་དབྱེར་མེད་པའི་འབྲས་བུ་ཐོབ། ཕྱག་རྒྱ་ནི་ཕྱག་རྒྱ་ཆེན་
པོ་དང་འབྲེལ་ལོ། །ལས་ཀྱི་ཕྱག་རྒྱས་ལམ་གང་བ་སླང་། བདེ་བ་ལམ་དུ་བསླང་། རྒྱ་གང་གིས་གདབ། དེ་བཞིན་གཤེགས་པའི་རྒྱས་གདབ། དབུགས་གང་གིས་དབྱུང་། དེ་བཞིན་གཤེགས་
1-4-30a

པས་དབུགས་དབྱུང་། ལྟ་བ་གར་སླེབ། སེམས་ཙམ་གྱི་ལྟ་བར་སླེབ། འབྲས་བུ་གར་སྨིན། རྒྱུ་འཐུན་པའི་འབྲས་བུར་སྨིན། ཆོས་ཀྱི་ཕྱག་རྒྱས་ལམ་དུ་གང་བསླང་།
ཆོས་ཉིད་ལམ་དུ་བསླང་། རྒྱ་གང་གིས་གདབ། རྡོ་རྗེ་འཆང་གིས་གདབ། དབུགས་གང་གིས་དབྱུང་། རྡོ་རྗེ་འཆང་གིས་དབུགས་དབྱུང་། ལྟ་བ་གར་སླེབ། དབུ་མའི་ལྟ་བར་སླེབས། འབྲས་བུ་
གར་སྨིན། རྣམ་པར་སྨིན་པའི་འབྲས་བུ་སྨིན། ཕྱག་རྒྱ་ཆེན་པོས་ལམ་དུ་གང་བསླང་། སྣང་སྲིད་ལམ་དུ་བསླང་། རྒྱ་གང་གིས་གདབ། རྡོ་རྗེ་སེམས་དཔའི་རྒྱས་གདབ། དབུགས་གང་གིས་
དབྱུང་། རྡོ་རྗེ་སེམས་དཔའ་དབུགས་དབྱུང་། ལྟ་བ་གར་སླེབ། ཟུང་དུ་འཇུག་པ་ནམ་མཁའ་མཉམ་པའི་ལྟ་བར་སླེབས། འབྲས་བུ་གར་སྨིན། དྲི་མ་དང་བྲལ་བའི་འབྲས་བུ་སྨིན། དམ་ཚིག་
ཕྱག་རྒྱས་ལམ་དུ་གང་བསླངས། ཀུན་བཏགས་ལམ་དུ་བསླངས། རྒྱ་གང་གིས་གདབ་ན། དེ་བཞིན་གཤེགས་པའི་རྒྱས་གདབ། དབུགས་གང་གིས་དབྱུང་། དེ་བཞིན་གཤེགས་པའི་
དབུགས་དབྱུང་། ལྟ་བ་གར་སླེབ། ཉན་ཐོས་ཀྱི་ལྟ་བར་སླེབས། འབྲས་བུ་གར་སྨིན། སྐྱེས་བུ་བྱེད་པའི་འབྲས་བུ་སྨིན། ཐེ་ཚོམ་སེལ་བ་ལས། ཨེ་བཾ་རྣམ་པ་རྒྱུ་འཐུན་ཉིད། །རྣམ་སྨིན་
1-4-30b

ཆོས་ཀྱི་འཁོར་ལོ་ལས། །ལོངས་སྤྱོད་སྐྱེས་བུ་བྱེད་པ་ཉིད། །བདེ་བའི་འཁོར་ལོ་དྲི་མེད་ཉིད། །རྒྱུ་འཐུན་སོགས་པས་རབ་དབྱེའོ། །འབྲས་བུ་རྣམ་པ་བཞི་ཞེས་བརྗོད། །ཅེས་པའོ། །དེ་ལ་ལས་ཀྱི་
ཕྱག་རྒྱ་ལ་བརྟེན་པར་འདོད་ན། རིག་མའི་མཚན་ཉིད་ནི། རིགས་བཙུན་པ། ལུས་མཛེས་ཤིང་ཡིད་དུ་འོང་བ། སྐད་མདངས་འཇམ་ཞིང་ཚིག་བཙུན་པ། དྲི་ཞིམ་ཞིང་མདངས་དང་ལྡན་པ། ཤེས་
རབ་ཆེ་ཞིང་སྣོད་ཐུབ་པ། ཉོན་མོངས་ཆུང་ཞིང་སྦྱོར་བ་ཐབས་ལ་གཟོ་བ། འདོད་ཆགས་ཆེ་བ། ངོ་ཚ་ཆེ་བ། གཙང་སྦྲ་དང་ལྡན་པ། བརྩེ་གདུང་ཆེ་བ། དེ་ལྟ་བུའི་རིག་མ་ནི་དབང་གི་དུས་སུ་བརྟེན་
པར་བྱ་སྟེ། ཡབ་ཡུམ་གྱི་མཁའ་གསང་བྱིན་གྱིས་བརླབས་ནས། སྙོམས་པར་ཞུགས་པ་ལས། རྡོ་རྗེ་ནོར་བུའི་གྲོང་གི་དཀྱིལ་འཁོར་དུ་བྱང་སེམས་ཀྱི་ཁུ་བའི་རྣམ་པ་ལས་འདིའི་ངོ་བོ་ཉམས་
སུ་མྱོང་། ཐིག་ལེ་རྡོ་རྗེ་ཐོད་སྦྱོར་གྱི་གདམས་ངག་ནི། དུས་ཚོད་འཛིན་པ་ཁུ་བྱུག་ལྟ་བུ་སྟེ། རྩ་དང་རླུང་དང་ཐིག་ལེའི་དུས་ཚོད་འཛིན་པའོ། །བཟུང་བའི་མན་ངག་ལ་གསུམ་ཏེ(སྟེ)། ཏིང་ངེ་འཛིན་གྱིས་
བཟུང་བ་དང་། ཡི་གེ་རབ་མཆོག་གིས་བཟུང་བ་དང་། ཟངས་ཚགས་ཅན་གྱིས་བཟུང་བ་དང་གསུམ་མོ། །བཟློག་པའི་མན་ངག་ལ་གསུམ་སྟེ། རླུང་གིས་བཟློག་པ་དང་། ཏིང་ངེ་འཛིན་གྱིས་
1-4-31a

བཟློག་པ་དང་། བཙན་ཐབས་ཀྱིས་བཟློག་པ་དང་གསུམ་མོ། །ཐམས་ཅད་ལ་ཁྱབ་པར་བྱ་བ་ལ་གསུམ། འཕྲུལ་འཁོར་གྱིས་ཁྱབ་པར་བྱ་བ་དང་། ཏིང་ངེ་འཛིན་
གྱིས་ཁྱབ་པར་བྱ་བ་དང་། སྤྱོད་ལམ་གྱིས་ཁྱབ་པར་བྱ་བ་དང་། ཏིང་ངེ་འཛིན་གྱིས་བཟུང་བར་བྱ་བ་ནི། སྤྱི་བོའི་ཧཾ་ལ་དམིགས་པ་ལྷན་གྱིས་གཏོད་པའོ། །ཡི་གེ་རབ་མཆོག་གིས་བཟུང་བ་ནི། གསང་
གནས་སུ་ཨོཾ་ཨཱཿཧཱུཾ་བསྒོམ་པའོ། །ཟངས་ཚགས་ཅན་ནི་རྩ་ཐམས་ཅད་ཟངས་དུང་གྱེན་ལ་བསྒྲེངས་པ་ལྟར་བསྒོམ་པའོ། །བཟློག་པ་ལ་སྟེང་རླུང་མནན། འོག་རླུང་བསྡམ། གླིང་བཞི་བསྡུ། རྒྱ་
མཚོ་རི་རབ་ལ་སྦྱར། ལྕེ་ཡར་རྐན་ལ་གཏད། ཆུ་མིག་གྱེན་དུ་བཟློག །ཧིག་གིས་དྲག་ཏུ་འཐེན། གཡས་གཡོན་དུ་ཐེབས་གསུམ་གསུམ་དྲང་། དབུས་སུ་ཐེབས་གསུམ་དྲང་། ལུས་
ཐམས་ཅད་ལ་ཁྱབ་པར་བྱ་བའི་ཐབས་ལ། སེངྒེའི་བལྟ་སྟངས་དང་། གཡས་སུ་ཕྱི་མིག་བལྟ། གཡོན་དུ་ཕྱི་མིག་བལྟ། སེངྒེའི་སྤྲུག་སྟངས་བྱས་ལ་ལུས་དྲག་ཏུ་སྤྲུག །དེ་རྣམས་ནི་
ལུས་ཐམས་ཅད་ལ་ཁྱབ་བར་བྱ་བའི་མན་ངག་གོ། །པུ་ལ་ཧ་རིའི་ན་རོ་པ་ལས་རྙེད། རྩིས་ཀྱི་རྒྱ་བདུན་དང་[སངས་རྒྱས་ཀྱི་རྒྱ། བསྡུད་པ་པོའི་རྒྱ། མཁའ་འགྲོ་རྣམས་ཀྱི་རྒྱ། སྐུ་གསུང་ཐུགས་ཀྱི་རྒྱ། བླ་མ་རྣམས་ཀྱི་རྒྱ། ཆོས་
1-4-31b

རྣམས་ཀྱི་རྒྱའོ། །]བཅས་ཏེ་དམ་པར་སྦས་སོ། །ས་མ་ཡ་པ་ཏི། རྐྱང་པ་ཁྲི་དང་བརྒྱད་བརྒྱར་འཇུག །ཕྲུགས་སུ་སྦྱར་ན་ཉི་ཁྲི་དང་། །ཆིག་སྟོང་དྲུག་བརྒྱར་རབ་ཏུ་བརྟག །ཅེས་པ་དང་འཐུན་པར་འདུག །
འཁོར་ལོ་ཉི་མ་བཞི་ཐུན་རྐྱང་། །ཟླ་བ་ཁུགས་པ་ནམ་མཁའ་འཚང་། །དོན་གྱི་ཤུགས་ལ་ཁོ་བོས་ཤེས། །མེས་པོའི་ནོར་ལ་ཚ་བོ་(བོས་)སྤྱོད། །ཨིྠྀ།། །།


目录
འོག་སྒོ་ལས་ཀྱི་རྡོ་རྗེའི་ཤོག་རིལ།